საგარეო საქმეთა მინისტრი გრიგოლ ვაშაძე ორდღიანი სამუშაო ვიზიტით დიდი
ბრიტანეთის და ჩრდილოეთ ირლანდიის გაერთიანებულ სამეფოში იმყოფება, იუწყება ინტერპრესნიუსი.
| | ADVERTISEMENT | This text is replaced by the Flash movie. |
|
|
| წაიკითხე სმარტფონში |  |
|
საგარეო საქმეთა სამინისტროს ინფორმაციით, ვიზიტის ფარგლებში გაიმართა გრიგოლ ვაშაძის შეხვედრები გაერთიანებული სამეფოს საგარეო და თანამეგობრობის სახელმწიფო მდივანთან უილიამ ჰეიგთან, ევროპულ საქმეთა სახელმწიფო მინისტრთან დევიდ ლიდინგტონთან, თემთა პალატის საგარეო ურთიერთობათა კომიტეტის თავმჯდომარესთან რიჩარდ ოტავეისთან, თავდაცვის კომიტეტის თავმჯდომარესთან ჯეიმს არბუტნოტთან, უსაფრთხოების კომიტეტის თავმჯდომარესთან მალკომ რიფკინდთან, საქართველოს საკითხებზე მომუშავე ინტერპარტიული საპარლამენტო ჯგუფის თავმჯდომარესთან დენის მაკშეინთან და საგარეო საქმეთა ჩრდილოვან მდივანთან დაგლას ალექსანდერთან.
საქართველოს საგარეო საქმეთა მინისტრმა მადლობა გადაუხადა გაერთიანებული სამეფოს საგარეო და თანამეგობრობის სახელმწიფო მდივანს ბრიტანეთის მთავრობის მიერ როგორც ორმხრივ, ასევე საერთაშორისო არენაზე საქართველოს მიმართ გაწეული მხარდაჭერისა და თანადგომისათვის.
თავის მხრივ, გაერთიანებული სამეფოს საგარეო უწყების ხელმძღვანელმა კიდევ ერთხელ გამოხატა ბრიტანული მხარის ერთმნიშვნელოვანი მხარდაჭერა საქართველოს სუვერენიტეტისა და ტერიტორიული მთლიანობისადმი. მან ხაზი გაუსვა ავღანეთში ნატო-ს ეგიდით მიმდინარე ISAF-ის სამშვიდობო ოპერაციაში ქართული კონტინგენტის მონაწილეობის მნიშვნელობას და დადებითად შეაფასა საქართველოში ბოლო პერიოდში განხორციელებული პოლიტიკური და ეკონომიკური რეფორმები.
გაერთიანებულ სამეფოში შეხვედრებისას, მხარეებმა განიხილეს საქართველოსა და გაერთიანებულ სამეფოს შორის ორმხრივი და მრავალმხრივი თანამშრომლობის პრიორიტეტული მიმართულებები, მათ შორის საქართველოს ევროპულ და ევროატლანტიკურ სტრუქტურებში ინტეგრაციის და საერთაშორისო ორგანიზაციების ფარგლებში თანამშრომლობის ძირითადი საკითხები. გრიგოლ ვაშაძემ ბრიტანულ მხარეს მიაწოდა ინფორმაცია საქართველოში მიმდინარე პროცესების, ეკონომიკური რეფორმების, საქართველოს ოკუპირებულ ტერიტორიებზე არსებული მდგომარეობისა და რეგიონში ვითარების შესახებ.
ვიზიტის ფარგლებში ასევე დაგეგმილია გრიგოლ ვაშაძის სიტყვით გამოსვლა დიდი ბრიტანეთის თავდაცვისა და უსაფრთხოების სწავლებათა სამეფო ინსტიტუტში (Royal United Institute for Defence and Security Studies).
საქართველოს საგარეო საქმეთა მინისტრის ვიზიტის პარალელურად, 15 დეკემბერს ლონდონში ორმხრივი პოლიტიკური კონსულტაციები გაიმართა საქართველოსა და გაერთიანებული სამეფოს საგარეო საქმეთა სამინისტროებს შორის, დეპარტამენტების დირექტორების დონეზე.
შეხვედრის დროს ხაზი გაესვა ორმხრივი ეკონომიკური და სავაჭრო ურთიერთობების გაღრმავების აუცილებლობას, საქართველო-ევროკავშირის თანამშრომლობის დღის წესრიგში არსებულ ძირითად პრიორიტეტებს და შემდგომი განვითარების პერსპექტივებს, საქართველოს ევროატლანტიკურ სტრუქტურაში ინტეგრაციის პროცესს. ბრიტანულ მხარეს მიეწოდა ინფორმაცია საქართველოს ოკუპირებულ ტერიტორიებზე არსებული მდგომარეობის შესახებ და დეტალურად იქნა განხილული საერთაშორისო ორგანიზაციების ფარგლებში მიმდინარე თანამშრომლობის აქტუალური საკითხები. ყურადღება გამახვილდა მხარეებს შორის რეგულარული ორმხრივი პოლიტიკური კონსულტაციების გამართვის მნიშვნელობაზე.
Related Stories
